Bu il qədim türk daş kitabəsi olan Bilgə Tonyukuk abidəsinin YUNESKO-nun himayəsi ilə 1300 illik yubileyi qeyd olunur. 24.04.2020 il tarixində Beynəlxalq Türk Akademiyasının təşkilatçılığı, eləcə də türkdilli beynəlxalq təşkilatların rəhbərləri və tanınmış türkoloq alimlərin iştirakı ilə “Böyük Çöl Sivilizasiyası: Tonyukuk İrsi və Müasir Türk Dünyası” mövzusunda video konfrans keçirilmişdir. Beynəlxalq Türk Mədəniyyəti və İrsi Fondunun Prezidenti Günay Əfəndiyeva konfransda açılış nitqi ilə çıxış etmişdir. Günay Əfəndiyeva çıxışında konfransın fəaliyyətinə uğurlar diləyərək, bu çətin günlərdə göstərdiyi təşəbbüsə görə Beynəlxalq Türk Akademiyasına minnətdarlığını bildirmişdir. Bilgə Xaqanın vəziri olmuş Tonyukukun adına 720-ci ildə daş kitabənin qoyulmasını onun şəxsiyyətinin böyüklüyü ilə əlaqələndirən natiq, tarixdə Türk kəliməsinin ilk dəfə bu Kitabədə rast gəlindiyini qeyd etmişdir. Eyni zamanda, abidə ilə bağlı araşdırmaların aparılmasının vacibliyini vurğulayaraq, Fondun Türk Dünyasının irsinə yönəlmiş layihələrə hər zaman dəstək verməyə hazır olduğunu diqqətə çatdırmışdır.