Beynəlxalq Türk Mədəniyyəti və İrsi Fondunda “Türk dövlətləri: Şərq və Qərb arasında körpü” adlı dəyirmi masa keçirilib. Tədbir çərçivəsində Beynəlxalq Türk Mədəniyyəti və İrsi Fondu və Bakı Dövlət Universitetinin əməkdaşlığı ilə təşkil edilən, universitetin Şərqşünaslıq fakültəsinin 100 illik yubileyinə həsr olunmuş “Azərbaycan şərqşünaslığı Şərq-Qərb elmi-mədəni və ictimai-siyasi dialoqu kontekstində” mövzusunda beynəlxalq elmi konfransda iştirak edən qonaqlarla görüş təşkil olunub.

Dəyirmi masa Beynəlxalq Türk Mədəniyyəti və İrsi Fondunun fəaliyyətinin prioritet istiqamətlərini əks etdirən videoçarxın nümayişi ilə başlanıb.

Tədbiri giriş sözü ilə açan Beynəlxalq Türk Mədəniyyəti və İrsi Fondunun prezidenti Günay Əfəndiyeva tədbir iştirakçılarına Türk Dünyasının qədim mədəni irsinin öyrənilməsi, qorunması, və dünyada təbliği yönünde təşkilatın fəaliyyəti, həyata keçirdiyi müxtəlif layihələr haqqında məlumat verib. Günay Əfəndiyeva Bakı Dövlət Universitetinin Azərbaycanın mədəni-mənəvi inkişafına xidmət göstərən qocaman maarif ocaqlarından biri olduğunu vurğulayaraq, universitet ilə əməkdaşlığın önəmindən söz açıb. Fondun prezidenti türk dövlətlərindən olan elm və mədəniyyət xadimlərinin dəyrimi masada bir araya gətirilməsinin türk xalqları arasında mənəvi bağların möhkəmləndirilməsinə, onların daha da yaxınlaşmasına töhfə verdiyini vurğulayıb. Günay Əfəndiyeva dünya tarixinin önəmli bir parçası olan türk xalqlarının Şərq və Qərb sivilizasiyalarının qovuşduğu coğrafiyada məskunlaşmasından bəhs edərək, onların Avropa və Asiya arasında qarşılıqlı elmi-mədəni mübadilələrdə oynadığı rolun əhəmiyyətinə diqqət çəkib.

Dəyirmi masada çıxış edən Bakı Dövlət Universitetinin rektoru Elçin Babayev Şərq və Qərb mədəniyyətləri arasında körpü funksiyasını daşıyan türk dövlətlərinin həm fiziki, həm də mənəvi baxımdan böyük bir yol olduğunu vurğulayıb. Rektor müasir dövrdə türk dövlətlərinin bütün sahələrdə münasibətlərinin gücləndirilməsinin türk birliyi ideologiyasının inkişafına təkan verdiyini qeyd edib. Elçin Babayev təşkilat tərəfindən Türk Dünyasının inteqrasiyası yönündə aparılan işləri yüksək qiymətləndirərək, Fond ilə əməkdaşlıqdan məmnunluq duyduğunu dilə gətirib.

Tədbirdə çıxış edən Millət vəkili Jalə Əliyeva eyni soydan gələn, ortaq milli-mədəni dəyərləri bölüşən dost və qardaş xalqlardan olan elm adamlarının görüşünü bayram adlandıraraq, Türk Dünyasının tarixi və mədəni irsinin beynəlxalq miqyasda tanıdılması məqsədi ilə Fond tərəfindən həyata keçirilən layihələri təqdirəlayiq hesab etdiyini bildirib.

Milli Məclisin deputatı, akademik Nizami Cəfərov Türk xalqlarının məskunlaşdığı coğrafiyanın onların Avropa və Asiya arasında iqtisadi, siyasi, mədəni əlaqələrdə fəal iştirakını şərtləndirdiyini bildirib. Nizami Cəfərov dəyirmi masanın işini türk xalqlarının minilliklər boyu qoruyub saxladığı dəyərlərin yaşadılması və gələcək nəsillərə ötürülməsinə töhfə kimi qiymətləndirib.

Milli Məclisin deputatı Vüqar İskəndərov müasir dövrdə türk dövlətlərinin hərtərəfli münasibətlərin genişləndirilməsinin bütün Türk Dünyasında aktuallığından bəhs edib. Vüqar İskəndərov Fondun fəaliyyətinin türk xalqlarının mədəni cəhətdən inteqrasiyası yönündə böyük əhəmiyyətini vurğulayaraq, təşkilata uğurlar arzulayıb.

Dəyirmi masada Qazaxıstanın L. Qumilyov adına Avrasiya Milli Universitetinin Türkologiya fakültəsinin professoru Nurila Şahmerdanova, Qırğızıstanın Oş Dövlət Universitetinin Şərqşünaslıq fakültəsinin professoru Baybolot Abitov, Ankara Universitetinin elmi işlər üzrə prorektoru Mustafa Fənər, Özbəkistanın Daşkənd Dövlət Şərqşünaslıq Universitetinin Ərəb filologiyası kafedrasının müdiri, professor Şarustam Şamusarov, Macarıstanın Eotvos Lorand (ELTE) Universitetinin Şərqşünaslıq fakültəsinin müəllimi Andras Czentnar, Varşava Universitetinin Şərqşünaslıq fakültəsinin dekanı, professor Pyotr Taraka, Bakı Dövlət Universitetinin Şərqşünaslıq fakültəsinin dekanı dosent Aydan Xəndan çıxış edərək, Türk dövlətlərinin Avrasiya məkanında rolu haqqında fikir mübadiləsi aparıb, öz sahələri üzrə fəaliyyətləri haqqında məlumat verib və Fondun ümumtürk mədəniyyətinin təbliği yönündə gördüyü işləri yüksək qiymətləndiriblər.

Dəyirmi masanın sonunda iştirakçılara Fondun hədiyyələri təqdim olunub və xatirə şəkilləri çəkilib.

Tədbirin bədii hissəsində türk dövlətlərindən olan sənətçilərin ifasında türk xalqlarına məxsus mahnılar səsləndirilib, milli musiqilər ifa edilib.

Dəyirmi masada Milli Məclisin deputatları, səfirlər, beynəlxalq təşkilatların təmsilçiləri, Fonda üzv və müşahidəçi ölkələrin türkoloq alimləri, tanınmış elm, mədəniyyət və ictimai xadimləri, ziyalılar iştirak edib.