Cari ilin 12-14 dekabr tarixlərində Türk dünyasının görkəmli yazıçısı Çingiz Aytmatovun 95 illik yubileyi Qırğız Respublikasının Nazirlər Kabinetinin Sərəncamı əsasında Mədəniyyət, İnformasiya və Turizm Nazirliyi tərəfindən təşkil olunub. Bişkekdə keçirilən tədbirdə Türk Mədəniyyəti və İrsi Fondunu təşkilatın Qırğız Respublikası üzrə nümayəndəsi Nazgül Omurzakova və Fərid Hüseyn təmsil ediblər.

Bişkekdə, Tarix Muzeyində keçirilən “Biz eyni gəmidəyik” adlı plenar iclasda Türk Mədəniyyəti və İrsi Fondu adından çıxış edən N.Omurzakova beynəlxalq təşkilatın Türk dünyasının mədəniyyəti, ədəbiyyatı və irsinin dünyada tanıdılması istiqamətində həyata keçirdiyi müxtəlif layihələrdən söz açaraq, habelə görkəmli yazıçı Çingiz Aytmatovun irsinin təbliği yönündə təşkilatın gördüyü işlərdən, ədibin türk mədəniyyəti və ədəbiyyatı tarixindəki müstəsna xidmətlərindən bəhs edib.

Həmçinin Fondun təqdimatı ilə tədbirdə Azərbaycan Respublikasının Əməkdar artisti, Bakı Bələdiyyə Teatrının aktrisası Hüsniyyə Mürvətova da iştirak edib. H.Mürvətova çıxışında Türk Mədəniyyəti və İrsi Fonunun sifarişi ilə Bakı Bələdiyyə Teatrı tərəfindən səhnələşdirilən Çingiz Aytmatovun “Ana tarlası” əsərinin tamaşaya qoyulmasından, Azərbaycan tamaşaçıları tərəfindən səhnə əsərinə olan yüksək maraqdan danışıb. H.Mürvətova həmin tamaşada canlandırdığı Tolqanay ana obrazının bir aktrisa kimi onun sənət həyatında əhəmiyyətli rol oynadığından bəhs edib və sonda tamaşanın epiloqunu canlandırıb.

Daha sonra tədbirin II müzakirə panelində Fondun əməkdaşı Fərid Hüseyn “Hər yeni əsrlə bərabər yeni mahiyyət qazanan Çingiz Aytmatov ideyaları” adlı məruzə ilə çıxış edərək, görkəmli ədibin XXI əsrin çağırışları ilə səsləşən ədəbi düşüncələrindən söz açıb, habelə ədibin aktual yaradıcılığının Türk Mədəniyyəti və İrsi Fondunun dəstəyi ilə tərcüməsi, çapı, o cümlədən, təşkilatın sifarişi ilə Azərbaycan teatrlarının səhnələşdirdiyi tamaşalarının yeni səhnə həyatı qazanmasının önəmindən söz açıb.